Arquivo da categoría: FEAFES

Morreu José Luis Muruzábal, presidente de APEM

Hoxe sumámonos á condolencia que nos transmiten, entre outras, as bisbarras das Mariñas, Betanzos, Bergantiños e Fisterra. O motivo: morreu o avogado e sindicalista José Luis Muruzábal Arlegui, un exemplo de como, sen ser afectado, se pode encabezar durante décadas unha loita pola dignidade e calidade de vida das persoas con enfermidades mentais.

Muruzábal era presidente de APEM, asociación pro enfermos mentais con centros na Coruña, Cambre, Betanzos, Carballo e Cee. APEM está federada, xunto con outras asociacións deste ámbito, en FEAFES Galicia.

Saúde mental, vivenda e protección xurídica (xornada organizada por FEAFES)

FEAFES Galicia organiza a xornada “Alternativas de futuro innovadoras en saúde mental: vivendas e novas medidas de protección xurídica” o vindeiro 21 de marzo en Santiago de Compostela, concretamente na Escola Galega de Administración Pública. Para saber máis ou inscribirvos, poñédevos en contacto con FEAFES Galicia no teléfono 900 102 661.

O programa da xornada pode verse na seguinte imaxe:

programa da xornada

Nas mesas redondas poderanse coñecer modelos interesantes, como o da Fundación Pública Andaluza para la Integración Social de Personas con Enfermedad Mental (FAISEM). Para ter unha idea do traballo da FAISEM, podedes ve-lo vídeo titulado “Sueño igual que tú”.

O enfermo mental, “suxeito perigoso” no anteproxecto de reforma do Código Penal

O anteproxecto de reforma do Código Penal, elaborado polo ministerio de Xustiza que dirixe Alberto Ruiz-Gallardón Jiménez, fundamenta algunhas das súas “medidas de seguridade” máis polémicas na peligrosidad del sujeto. Isto é, non fundamenta as “medidas de seguridade” nos delictos cometidos, senón naqueles delictos que, segundo a clarividencia da autoridade, o “suxeito perigoso” podería cometer no futuro.

¿Quen son eses suxeitos perigosos? Se isto fose unha novela distópica, os disidentes políticos encaixarían na categoría. É previsible que unha tempada no cárcere manteña intactos (ou radicalice aínda máis) os pensamentos de moitos opositores.

Pero a realidade é dura: os máis prexudicados na redacción do anteproxecto son os enfermos mentais inimputables. Parece unha reacción infantil por parte dun lexislador ávido de castigos exemplares e terribles. Como non podo impoñerlles unha pena, impóñolles unha “medida de seguridade” que pode chegar a ser perpetua. Se esta reforma sae adiante, os manicomios volveranse encher e os psiquiatras volverán ser policías.

Non servirá de nada o consenso xurídico, expresado por exemplo na Convención sobre os dereitos das persoas con discapacidade, texto que asinou e ratificou España. Tampouco non servirá de nada o consenso científico, expresado por exemplo no Manifiesto de Oviedo (elaborado pola Sociedad Española de Psiquiatría, a Sociedad Española de Psiquiatría Biológica e a Fundación Española de Psiquiatría y Salud Mental, 11 – XI – 2011):

[…] la peligrosidad y relación con actos violentos de la persona con enfermedad mental no es la norma habitual en su comportamiento y han de considerarse, tal y como son, hechos aislados […]

Para profundar, recomendámo-la lectura do artigo “Anteproyecto de reforma del Código Penal: el regreso al enfermo mental como ‘sujeto peligroso'” (alansaludmental.com, 8 – II – 2013)

Enlaces relacionados:

ASBIGA participará no curso “Voluntariado en Saúde Mental” 2013

ASBIGA foi convidada a falar do trastorno bipolar no curso de formación “Voluntariado en Saúde Mental” que terá lugar na Universidade de Santiago de Compostela entre o 22 de febreiro e o 2 de marzo do 2013. No curso está previsto que participen outras asociacións como Itínera, Xaruma, TP-Galicia, Fonte da Virxe, Andaina e FEAFES Galicia.

Tamén está prevista a colaboración de profesionais como:

  • Carlos Álvarez García (psicólogo clínico no CHUS)
  • Luis Ferrer i Balsebre (coordinador de Psiquiatría no CHUS)
  • Ramón Area Carracedo (psiquiatra no Hospital Psiquiátrico de Conxo)
  • Ramón Ramos Ríos (psiquiatra no Hospital Psiquiátrico de Conxo)

Programa do curso:

programa do curso

Cartel do curso:

cartel do curso